அழுகுரல் கேட்டுணர்ந்து வந்த தாய்
குழந்தையை மடியினில் வைத்து
ஊட்டினாள் புட்டிப்பாலை.

பசியடங்கி படுத்துறங்கிய குழந்தையைக்கண்டு
கண்ணீரோடு கீழே ஊற்றினாள்
மீதமிருந்த கள்ளிப்பாலை.

உடையில்லா உடலைக்கண்டு
உடைந்த நெஞ்சம் சொல்லிவிடும்
கொல்லப்பட்டது பெண்பாலை!

• நிலமும்
  நீயும்
  ஒன்றேயடி.
  என் ஜீவனை சுமப்பதால்!

• நீரும்
  நீயும்
  ஒன்றேயடி.
  ஆழம் தெரியவில்லை!

• காற்றும்
  நீயும்
  ஒன்றேயடி.
  உரசும் போது சிலிர்த்து விடுகிறேன்!

• வானும்
  நீயும்
  ஒன்றேயடி.
  முதலும் முடிவும் தெரிவதில்லை !

• நெருப்பும்
  நீயும்
  ஒன்றேயடி.
  கண்களால் தொடமுடிந்தும் …..
  கைகளால் முடியவில்லை!!!

- பிரவீன் குமார் செ